assadaassiasi

باراسيتامول / تقرير ابراهيم اشويبة

0 30

الباراسيتامول:

اليوم غادي نهضروا على الباراسيتامول.. وغنعطيكم أولا أمثلة ديال بعض الأدوية لي كيحتويوا على هاد المادة.

ماكاينش شي واحد فينا ما عمرو استعمل دوليبران (Doliprane) او دولوسطوب (Dolostop), أندول (Andol), بارنتال (Parantal), أو Parasphan, وهادو كلهوم فيهم الباراسيتامول.. فشنو هي هاد المادة وشنو كاتعالج ؟

الصيغة الكيميائية ديالو هي C8H9NO2 وهاد المادة كتعتبر مسكن وخافض للحرارة واسع الاستخدام.. غير هو ماخصش يتخالطوا لينا الباراسيتامول والأسبيرين (Aspro) حيت هوما مادتان مختلفتان, وطريقة العمل ديالهوم ماشي بحال بحال.

الباراسيتامول كيتعطى بدون وصفة ديال الطبيب هادي كلشي عارفها, ولكن الغالبية ماعارفينش أنك إيلا خديتي جرعة زائدة تقدر تسبب ليك فبزاف ديال الامراض بحال هبوط نسبة السكر فالدم وتجلط الدم, تسمم كبدي او الفشل الكبدي, حيث كيتم امتصاص الباراسيتامول من طرف الأمعاء وكيتحول فالكبدة لمواد غير فعالة كتراكم فخلايا الكبدة.. وحنا عارفين أن أبسط خلل فالكبد كيقدر يأثر على مجموعة من الاعضاء فجسم الانسان ويقدر يوصل الأمر للوفاة في حال الفشل الكبدي.

8غرام من الباراسيتامول قادرة تنهي حياة انسان لي متوسط الوزن ديالو 70 كيلو.. علما أن وفاة اللاعب الزروالي رحمه الله تعود لتناوله جرعة كبيرة من هذه المادة لعلاج اَلام كان يشعر بها, مما تسبب له في تدمير حاد للكبد.

بزاف دالمرات الناس ما كيعرفوش ان الباراسيتامول هو احد مكونات بزاف ديال الدوايات المركبة ديال la grippe بحال Rinomicine, وكياخدوا جوح دوايات كيحتويوا على هاد المكون جزئيا أو كليا (مثلا Rinomicine +Doliprane), أو كاع جوج دوايات كيحتويوا على هاد المادة حصريا حيت كيعتبروهوم مختلفين وكيتخيلوا أنهم إيلا استعملوهوم بجوج غيكون المفعول أقوى, مثال:(Doliprane+Efferalgan), الشي لي كيخلي نسبة الباراسيتامول تولي طالعة فالدم ويقدر يشكل خطورة.

الجرعة الاَمنة من الباراسيتامول هي 500-1000ملغ كل 6 سوايع بالنسبة للبالغين, والجرعة اليومية خاصها تكون قل من 4غرام بالنسبة للكبار (قل من 3g بالنسبة للمصابين بالفشل الكلوي, بمعدل حبة كل 8 ساعات), أما الاطفال فحسب الوزن ديالهم.

بالنسبة للناس اللي مراض بالكبدة فكاين واحد المسكن فيه باراسيتامول والميتيونين (Methionine), وهي المادة اللي كتفاعل معاه باش تقلل من تأثير الباراسيتامول الضار على الكبدة.

منقول بتصرف

: بقلم ابراهيم اشويبة

اترك رد

لن يتم نشر عنوان بريدك الإلكتروني.