assadaassiasi

بقلم / ابراهيم اشويبة : مساج للشعب بطريقة ذكية

0 35

: بغض النظر على هاد الهضرة لي قالت هاد السيدة المجهولة الهوية ديال الشريحة و بيل ݣيݣس و روكفالا و الأخطاء لي كيبان مقصودين يتعاودو بزاف ديال المرات فالڤيديو و بغض النظر على هاد المنابر الإعلامية الخمسة و لا ستة لي جاو عطاوها الكلمة و لي عادة عمرها كانت هاد القضية مع أي مواطن عادي إلا مع المشاهير 6 ديال الميكروفونات يعني هاد الناس عارفين مسبقا أنهم غا يديرو بيها البوز
هادشي كامل ما غنهضرش عليه لي بغيت نهضر عليه هو علاش بالضبط النݣافات ديال المخزن بحال رشيد العلالي و التيجني بل و وصل الأمر حتى الإداعة هضرات على هاد السيدة فبرنامج صباحي ديال النݣافة رشيد الإدريسي ناضو كاملين ضحكو عليها و وصفوها بالجهل
آه بعض من الهضرة لي قالت هي هضرة تافهة و أخطاء بالجملة فالمصطلحات لكن راه الفايس عامر بالتافهين و التافهات علاش عمر النݣافات هضرو عليهوم و نتاقدوهوم
من اللخر بان ليا هادشي بحال لا إيكسبري مديور و بغاو يوصلو للناس أن هاد الفئة لي رافضة التلقيح و الجواز هي فئة جاهلة و ما عارفة تا لعبة و غير كيخربقو

شخصيا فين ما كنشوف النݣافات و الصفحات المخزنية المرقاوية تافقو على شي حاجة كاملين و هضرو عليها إلا و بغاو يدوزو للشعب ميساج.

بقلم ابراهيم اشويبة

اترك رد

لن يتم نشر عنوان بريدك الإلكتروني.